ചുംബനങ്ങളുടെ രാജ്യം

ഈ ക്യാമ്പസ്
ചുംബനങ്ങളുടെ ആത്മാക്കൾ
ഗതികിട്ടാതെ അലഞ്ഞുതിരിയുന്ന
ശവപ്പറമ്പാണ്.

കൊടുക്കാൻ മറന്നതും
വാങ്ങാൻ വിട്ടുപോയതും
വേണ്ട വേണ്ടെന്നു തിരിഞ്ഞു നടന്നതും
വേണം വേണമെന്ന്
കുട്ടികളെപ്പോലെ വാശിപിടിച്ചതും
കട്ടു കൊണ്ടുപോയതും
പിടിച്ചുപറിച്ചതുമായ ചുംബനങ്ങൾ
കൂട്ടംകൂട്ടമായ്‌ വന്ന്
കെട്ടിമറിയുന്നുണ്ടാവണം ഇവിടെ.

ഓരോ അർദ്ധരാത്രികളിലും.
നിലാവ് ചിതറിയ ഇടനാഴികളിലും
നെല്ലിമരച്ചുവട്ടിലും,
വിപ്ലവത്തിൻറെ ചുവന്നപൂക്കൾ
പെരുമഴപോലെ പൊഴിയുന്ന
വാകമാരച്ചോട്ടിലും
സീൽക്കാരങ്ങളുതിർത്ത്
ഇണചേരുന്നുണ്ടാവണം..

പ്രണയത്തിൻറെ തീവണ്ടിതട്ടി മരിച്ച
അജ്ഞാത ചുംബനങ്ങൾ
ദൂരെ മാറിയിരുന്ന്‌
ആസ്വദിക്കുന്നുണ്ടാവണം.
ചുണ്ടുകളില്ലാത്ത ദ്വീപുകളിലെ
അപ്രതീക്ഷിതമായ സമര പ്രഖ്യാപനങ്ങൾ.
ചുംബനങ്ങളിലൂടെ സ്വതന്ത്രമാകുന്ന
അപരിഷ്കൃതമായ
ഒരു രാജ്യത്തിന്റെ ആവേശങ്ങൾ.
ചുംബനങ്ങളുടെ മാനിഫെസ്റ്റോ..
ചുംബനങ്ങളുടെ റിപബ്ലിക്

അവർ പരസ്പരം ചേർന്നിരുന്ന്
ആഴത്തിൽ ചുംബിച്ചുകൊണ്ട്
പറയുന്നുണ്ടാവണം
ചുംബനങ്ങളുടെ രാജ്യം വരും-
ചുംബനങ്ങളുടെ രാജ്യം വരും എന്ന്...